တည်ကြည်တဲ့ယောက်ျားနဲ့ မပျင်းတဲ့မိန်းမ

တည်ကြည်တဲ့ယောက်ျားနဲ့ မပျင်းတဲ့မိန်းမ


ဘယ်ယောက်ျားက ယောက်ျားကောင်းလဲ၊ ဘယ်မိန်းမက မိန်းမကောင်းလဲဆိုတာ အမြဲစဉ်းစားထားပြီးသားမို့ စကားလုံး တစ်လုံးစီနဲ့ အပြီးဖြေပစ်လို့ရပါတယ်၊ ယုံ…။

တန်ဖိုးရှိတဲ့ယောက်ျား၊ အရည်အချင်းရှိတဲ့ ယောက်ျားဆိုတာကို စကားတစ်လုံးတည်းနဲ့ပြောဆိုရင် တည်ကြည်တဲ့ ယောက်ျားဟာ တန်ဖိုးရှိတာပဲ၊ အရည်အချင်းရှိ တာပဲ၊ ယောက်ျားကောင်းပဲ။ ဒီတစ်လုံးပဲ “တည်ကြည်“၊ ကိစ္စ ပြတ်ပြီ။

မြန်မာအဘိဓာန်မှာ တည်ကြည်ကို ဒီလိုအဓိပ္ပာယ်ဖွင့်တယ်။

တည်ကြည်-ကြိ-စိတ်ဓာတ်ဖြောင့်မတ် တည်ငြိမ်သည်၊ သိက္ခာသမာဓိရှိသည်။ ပြီးပြီ။ အဲဒါ ယောက်ျားကောင်းပဲ။

စိတ်ဓာတ်ဖောက်ပြန်တတ်တဲ့သူ၊ ခုတစ်မျိုး တော်ကြာတစ်မျိုးလုပ်သူ၊ စိတ်ရော ကိုယ်ပါ ဂဏှာမငြိမ်သူ၊ ယောက်ယက်ခတ်သူ၊ မတည်ငြိမ်သူ၊ သိက္ခာမရှိသူ၊ ကတိ မတည်သူ၊ အချိန်မလေးစားသူ၊ ပျံ့လွင့်သူ၊ စိတ်သဘောထား သေးသိမ်သူ၊ မရိုးဖြောင့်သူ အဲဒီလူတွေဟာ ယောက်ျားအင်္ဂါသာ ပါချင်ပါမယ်၊ ယောက်ျားကောင်းတွေ မဟုတ်ဘူး။

မိန်းမ…အရည်အချင်းရှိတဲ့မိန်းမ၊ တန်ဖိုးရှိတဲ့မိန်းမ၊ မိန်းမကောင်း ဘယ်လိုအဓိပ္ပာယ်ဖွင့်ဆိုမလဲ။
မိန်းမကောင်းအင်္ဂါ ဘာညာသရကာတွေနဲ့ တိုင်းတာနေစရာမလိုဘူး၊ တိုင်းတာလို့လည်း တိုင်းတာသူကိုယ်တိုင်က ဘယ်လိုတိုင်းတာရမလဲ သိချင်မှသိမယ်။ စကား တစ်လုံးတည်းနဲ့ပြီးတယ်၊ မိန်းမကောင်း ဟုတ်မဟုတ်ဆိုတာ၊ ယုံ..။

ဘယ်သူလဲ မိန်းမကောင်း….မပျင်းတဲ့ မိန်းမ။ ပြီးပြီ…စကားတစ်လုံးတည်းပဲ။

မြန်မာအဘိဓာန်က ဒီလိုအဓိပ္ပာယ်ဖွင့်တယ်။

ပျင်း-ကြိ-အလုပ်မလုပ်ချင်ဖြစ်သည်၊ ငြီးငွေ့သည်။ မပျင်းဘူးဆိုတာကျတော့ ဆန့်ကျင်ဘက် အနက်ယူလိုက်ပေါ့။ အလုပ်လုပ်ချင်သည်၊ မငြီးငွေ့…။

ဘာတွေလုပ်ချင်တာလဲ၊ ဘာကို မငြီးငွေ့တာလဲ။

အဲဒါမပြောခင် မိန်းမဆိုတာ ဘာလဲဆိုတာ အရင်ပြောပြရမယ်။ မိန်းကလေး ဖြစ်နေပြီး ကိုယ်ဘာလုပ်ရတယ်ဆိုတာ မသိတဲ့သူတွေလည်း ပြန်သတိရအောင်ပေါ့။

မိန်းမဆိုတာ…
မိန်းမဖြစ်လာရင် လုပ်ရတဲ့အလုပ်၊ ကျော်ဖြတ်ရတဲ့အဆင့်တွေ ရှိတယ်။ အဲဒါ မိန်းမသားဖြစ်မှ ခံစားခွင့်ရှိတယ်။ ယောက်ျားတွေက ခံစားခွင့်မရဘူး၊ အတုလုပ်လို့ မရဘူး။ ဒါကို အာဝေဏိကဒုက္ခလို့ ခေါ်တယ်။ ဘယ်မိန်းမ မဆို ဒါတွေဖြစ်တယ်၊ ဘယ်နိုင်ငံက မိန်းမ မဆိုဖြစ်တယ်။

အာဝေဏိကဒုက္ခ-မိန်းမတို့သာ ခံစားရသော ဒုက္ခဆင်းရဲ

၁။ ဥတုလာခြင်း(တစ်လတစ်ကြိမ် မိန်းမသဘာဝအရဖြစ်သော ကိစ္စ)

၂။ လင်၏အိမ်သို့လိုက်ရခြင်း (အိမ်ထောင်ကျတဲ့အခါ၊ အခုခေတ်ကတော့ အို…မလိုက်ပါဘူး၊ ကိုယ့်အိမ်ခေါ်မှာပေါ့ ဆိုလည်း ခေါ်ပေါ့၊ အိမ်ထောင်ကျရင် ပြောပါတယ်)

၃။ ကိုယ်ဝန်ဆောင်ရခြင်း (မိန်းမတစ်ယောက်ရဲ့ ပိုင်ခွင့်ရှိတဲ့အထဲက အကြီးမားဆုံးတန်ဖိုးပါပဲ)

၎။ သားဖွားရခြင်း (ကိုယ်တိုင် နောက်ထပ် ကိုယ့်လို လူသားတစ်ယောက် လောကထဲ ရောက်လာအောင် ရင်နဲ့လွယ်ပြီး အသက်နဲ့ရင်းလို့ ဖန်တီးနိုင်တဲ့ ဗိသုကာ၊ ပန်းပုဆရာ၊ ဖန်ဆင်းရှင်)

၅။ လင်ကိုပြုစုရခြင်း (ဟာ…ဘာလို့ပြုစုရမှာလဲ၊ သူက ပြုစုရမှာပေါ့ဆိုလည်း သဘောပေါ့၊ ပြုစုကြရင်သာ ပြီးတာပါပဲ)
အဲဒီငါးမျိုးကို မိန်းမတွေသာ ပိုင်ခွင့်ရှိတယ်၊ ဖြည့်ဆည်းနိုင်စွမ်းကြတယ်။

ဆိုတော့ ဘာမှမလုပ်ပါနဲ့ဦး၊ မိန်းမတစ်ယောက်ဖြစ်လာပြီးရင် စောစောသာ အနိစ္စသဘောနဲ့ ကိစ္စမချောခဲ့ဘူးဆိုရင် အဲဒီငါးမျိုးကိုသာ လုပ်ကြည့်ပါဦး။ ကဲ..ပျင်းတဲ့ မိန်းမ ဘယ်လို လုပ်နိုင်မလဲ။ ပျင်းပျင်းလေးနဲ့ လုပ်တာပေါ့ကွာလို့ ပြောမလား။

ဒီနေ့ခေတ်လို ကိုယ်တိုင်လည်း ပညာတွေ သင်ပြီးရင်း သင်၊ အလှလည်း ပြင်၊ ၀င်ငွေလည်း များများရှာ၊ သားသမီးလည်း ကျောင်းကောင်းကောင်း ထားနိုင်အောင် ကြိုးစား၊ ကိုယ့်လင်ယောက်ျားကိုလည်း တခြားယောက်ျားတွေထက် ခေါင်းတစ်လုံး မြင့်စေချင်၊

အိမ်ကိုလည်း သန့်ရှင်းတောက်ပြောင်နေစေချင်၊ မိဘ ဆွေမျိုးတွေကိုလည်း တာဝန်ကျေချင်၊ ဘာသာ သာသနာကိုလည်း ပစ်ပယ်မထားဘဲ ဆည်းကပ်ကိုးကွယ် ရိုကျိုးသူဖြစ်ချင်၊ အဓိဌာန်လေးဝင် ကံကောင်း ဥာဏ်ကောင်း သမာဓိကောင်းအောင် ပုံမှန် တရားဓမ္မလေးကလည်း ရှုမှတ်ပွားများချင်၊

သူငယ်ချင်း မိတ်ဆွေ အသိုင်းအ၀ိုင်းကြားမှာလည်း သူတို့ အားလပ်ရက် ခရီးသွားရင် ကိုယ်သွားချင်၊ သူတို့ နိုင်ငံခြား ဈေးဝယ်သွားရင် ကိုယ်သွားချင်၊

အသက်ကြီးလာပေမဲ့ အလုံးအဆစ်လေးတွေ မပျက်စီးဘဲ နေသားတကျ ရှိနေစေဖို့(ဆက်လက် ထိန်းသိမ်းထားရေး) အားကစားလေ့ကျင့်ကွင်း အပြေးအလွှား လည်း သွားလိုက်ချင်ဆိုတာမျိုးတွေ လုပ်မဲ့မိန်းမတစ်ယောက်ဟာ ပျင်းနေလို့ကတော့ ဘယ်လိုမှ မဖြစ်ဘူးဆိုတာကို ပြောလိုက်ချင်ပါတယ်။

မိန်းမကောင်းတစ်ယောက်ရဲ့ အင်္ဂါရပ်တွေက တကယ်တော့ အများကြီး မဟုတ်ပါဘူး။ ကျွန်မက ပျင်းတတ်တဲ့သူ မဟုတ်ပါဘူးဆိုတာ တစ်ခုတည်းနဲ့ကို အပိုမဆို အကြွားမပါ စကားနာထိုးစရာမလိုဘဲ ချေပ ပြောဆိုပြီး ဖြစ်ပါတယ်လို့ စေတနာကောင်းနဲ့ ဒီမောင်က ချစ်ခင် လေးစားစွာနဲ့ ပြောပြလိုက်ရပါတယ်ဗျာ။